政壇：李曠怡龔澧錫犬 聞食狗耍手擰頭
早幾日有網民發現於深水埗後巷，有人在光天化日下疑似劏狗，懷疑捕捉附近流浪狗煮食，惹來網民熱議，令一眾愛犬之人非常震驚及擔心。日前我哋見到有養貓狗嘅東華三院總理Jason李曠怡同鑽飾公司Julico董事兼菁英會成員John龔澧，提起其他國家地方有人食狗肉時，二人即心痛兼耍手擰頭。
李曠怡（左）同龔澧都養過寵物，堅拒食狗肉。
話說Jason家中養咗一貓一狗，至今已經十幾年，手機內與心愛寵物合照多到數唔晒，當正寵物係屋企人一樣咁愛錫，直言絕對接受唔到食狗肉呢回事。不過，莫講話食狗肉，Jason直言連稍為核突少少嘅食物佢都食唔落口，笑指食牛雜已經係佢極限喎。
另一邊廂，家中愛犬已經仙遊嘅John回想當年養寵物嘅情況，心中依然甜絲絲，曾經養咗松鼠狗好多年，佢對動物性情有一定了解，佢話啲狗嘅嗅覺真係非常靈敏，甚至會知道主人食過啲咩，聽聞如果主人食過狗肉，返到屋企啲狗就會聞到，會相當唔高興甚至會嬲，所以佢自己當然唔敢，亦唔會想去食狗肉。
