政壇：鄉議局開茶館覓財源
早前我哋講過長期財赤嘅新界鄉議局為求止蝕，不惜成立小組研究「改裝」大樓嘅專用停車場，劏開地舖出租「填氹」。言猶在耳，鄉議局基金最近就計劃開設《鄉．港茶館》社企項目，向政府部門申請開放大樓一樓餐廳及廚房，為附近工業區嘅上班族提供多一個開飯選擇，換言之即係將鄉議局「公家化」，唔知咁算唔算係城鄉共融嘅「德政」呢？
（設計圖片及對白）
鄉議局大樓嘅餐廳、廚房向來只為鄉紳同大樓使用者服務，但大樓場地租用率長期偏低，燈油火蠟嘅開支應該更加「和味」。適逢民政事務總署最近向鄉議局基金「科水」一百八十多萬元開設社企茶館，鄉紳就希望索性開放餐廳予公眾人士開餐。而為弘揚新界傳統飲食文化，鄉議局更提出喺茶館舉辦傳統小食製作班、茶藝班同盆菜宴，希望賺多一筆。
若然一切順利，預計茶館最快今年下半年開業，雖然據知茶館嘅營運盈餘會撥入鄉議局基金儲備或作慈善用途，但至少呢筆撥款可以減輕大樓部分財政壓力。
張學明唔敢挑戰發叔
有壓力嘅除咗大樓筆帳外，仲有鄉議局主席劉皇發嘅連任問題。鄉議局尋日舉行執委會會議，廈村鄉事委員會主席鄧勵東喺會議結束前，呼籲執委聯署支持發叔連任主席，仲盛讚發叔經得起考驗，係帶領鄉紳嘅不二人選，至於被指係潛在對手嘅副主席張學明，亦同另一副主席林偉強及全場執委舉手和應。
發叔就多謝大家好意，但佢自言已年近八十歲，擔心身體未必支持得住，着大家「畀啲時間我考慮吓啦」，五月先扑錘係咪競逐連任喎。不過，佢咁樣講得，應該多數都會做多屆主席嘞！
問張學明係咪有意同發叔爭一席位？佢斬釘截鐵咁話「點敢呀？傻嘅！」重申百分百支持發叔連任喎。上水鄉委會主席侯志強亦都話，早前同張學明喺三門仔嘅晚飯會面，純粹講私人生意，「不談政治」。
