滋擾東方猶死撐 香港郵政多藏奸

大家應該仲記得「信中信」奇案喇。話說舊年十月三十日，東方報業收到一封於同年八月廿九日寄出、懷疑因地址有誤而被退回嘅公文袋郵件。呢袋曾經被擅自拆閱嘅郵件裏面，竟然藏有另外九封同日投遞嘅郵件，九封信明明地址完整，貼足郵資，無法寄出已經講唔過去喇，更令人莫名其妙嘅係，九封信仲要拖咗成兩個月先至退回，其中一封更被開封後再以膠紙封口。正所謂，不近情者多藏奸，成件事疑點重重，你話當中冇蠱惑，細路仔都唔信喇。

其實盲嘅都睇得到，今次絕對唔係一般郵遞失誤咁簡單，而係擺明有人玩針對。可能作賊心虛啩，香港郵政嘅調查報告以「沒有紀錄」、「未能查明」、「調查困難」等字眼輕輕帶過，對於「信中信」嘅疑問，更索性將個波交畀警方，而警方調查報告同樣冇料到，嫌疑人身份同動機等，一問三不知。咪畀人踢爆，慌唔係郵政同警方夾埋扯貓尾，企圖草草結案，等件事慢慢丟淡，不了了之咩。

嗱，有學者就講得啱嘞，今次案件係涉及傳媒機構，唔能夠等閒視之，香港郵政嘅處理手法令人質疑係打壓新聞自由，必須查個水落石出，釋除公眾疑慮。對於學者嘅分析，太一叮舉腳贊成，唯一有異議嘅，係港府迫害正義傳媒事實俱在，路人皆見，絕對唔係質疑咁簡單。咁多年嚟，當局為打壓東方報業，無所不用其極，消防處、警務處、食環署、衞生署、控煙辦、淫審處、影視處、平機會等部門充當政治打手，輪流上陣，今次輪到香港郵政，唔知下次又係邊個部門呢？佢哋打壓花樣亦千奇百怪，手段推陳出新，羅織莫須有罪名、選擇性檢控、三重標準、假調查真滋擾等樣樣齊，今次係「信中信」，下次又係乜招呢？

話時話，正義傳媒為民喉舌，針砭時弊，揭醜揭腐，港英餘孽恨得要死，怕得要命，極欲打壓之而後快，一啲唔出奇。始終都係嗰句：「港之將亡，必有妖孽」。港府是非顛倒，黑白不分，愛國愛港者誅，反中亂港者侯，唔通香港真係氣數已盡？叮！