城中鏡：上影影：名模索女潮踩環迴單車
近日名人潮玩嘅270度環迴單車廣受追捧，由名模兼瑜伽導師黃佩霞打理嘅健身中心，喺日前就舉行咗一個名人環迴單車試玩日，廣邀名模出席試玩，計有陳嘉容、馬詩慧、歐陽妙芝、貝安琪同樂基兒等，仲有甄子丹太太汪詩詩同「玩具大王」蔡志明新抱汪圓圓添。
一眾名模包括歐陽妙芝（後右三）、汪詩詩（前左二）同汪圓圓（右一）試玩環迴單車。
Jessica C.（中）同男友安志杰（左）做運動都黐到實。
香汗淋漓勁享受
圓圓自誕下一女後，勤做運動無偷懶，身材開始由懷孕時嘅圓潤變得清減，佢試玩後仲立即將照片放上社交網，穿着吊帶運動tee嘅佢，試玩完後仲舉v影相賣萌，一臉興奮。而Jessica C.就帶同另一半出席，佢同男友安志杰自拍拖以嚟經常出雙入對，估唔到連做運動都黐到實，着吊帶運動tee嘅JC稍露事業線，着蝙蝠俠tee嘅安志杰，變身跟得男友，陪女友做運動。
有份試玩嘅陳嘉容透露當日個個踩到身水身汗，但十分享受，佢話：「嗰日個個都無化妝，唔怕以真面目見人，仲不停用手機玩自拍，好開心。」佢又話：「一路踩一路望住3D視覺效果，聽住音樂節奏，全部姊妹都動起來，踩到周身大汗，感覺好正。」
