城中鏡：陳南祿憶船上實習 嘔足四個月
香港大學擬規定學生需參加最少一次內地及其他國家交流計劃，副校長何立仁早幾日回應學生唔願意到內地交流嘅想法時指，如果唔想去內地，就唔好嚟港大，令學生嘩然。身為港大校友嘅食物及衞生局常秘謝凌潔貞尋日出席活動時，指當年做學生，社會資源冇咁豐富，能夠去澳門已經十分開心，莫講話去其他地方。
陳南祿話當年第一次出國係坐船，暈船浪嘔足四個月。
狄志遠難忘首次出門係到內地桂林。
早前調職往食物及衞生局做常秘的謝凌潔貞（右）同副局長陳肇始（左）表現合拍。
香港賽馬會尋日舉行社群日盃賽活動，撥款五億推「賽馬會青年生涯規劃」助青少年找到未來職業方向。喺活動上見到謝太，講起學生唔願意到內地交流時，謝太指明白現時學生擔心往內地嘅係「洗腦團」，因此較抗拒，但佢反問若果咁容易被洗腦，係咪去一次中東就會變咗伊斯蘭教？而每去一個地方都被洗腦一次？佢認為出國或到內地交流都好，只係增加學生嘅見識同經歷，提高自身批判能力。
狄志遠：學生受軟唔受硬
馬會大董陳南祿都係港大校友，佢話唔清楚何立仁當時嘅語氣，但仲記得當年要出國有俗稱「四海包機」，旅行社將航空公司賣剩嘅機票包起賣畀學生，而佢首次出國唔係坐飛機，而係大學時喺船上實習四個月，途經菲律賓同新畿內亞等地，暈船浪嘔足四個月，但當時有機會實習已經係非常難得，唔能夠有太多要求。
同場仲有社福界人士狄志遠，佢認為中港矛盾係導致部分年輕人唔想到內地嘅原因，但其實只要細心解釋到內地交流嘅好處，佢哋未必咁反感，因大多學生「受軟唔受硬」，當以一個規則去強迫佢哋，學生反而變得唔情願。科技大學校長陳繁昌就話唔方便評論港大嘅做法，但現時超過九成學生都會到內地或海外交流，認為唔需要硬性規定喎。
