近年立法會興「拉布」，拖低晒議事效率。立法會前秘書長Pauline吳文華依家幫緊立法會寫本「議事規則天書」，似乎都對「拉布」無乜辦法。尋日Pauline接受立法會議員Ann蔣麗芸嘅網上節目訪問時話，外國議會嘅議長通常有權禁止議員「拉布」，但香港嘅立法會主席要保持中立，突然「剪布」會有阻礙。

吳文華發現自己煮餸都幾叻，媽咪建議佢開私房菜添！（互聯網圖片）

至於第二個方法就係靠各黨派協調，外國議會常設聯絡小組，畀各黨派搞閉門討論。不過，Pauline話外國議會有執政黨，反對黨為咗將來執政鋪路，所以好少「去到咁盡」，先可以透過閉門討論達成共識，或有一定妥協，而香港政黨只需面對選民，無諗過執政，自然唔會讓步同妥協。睇嚟「拉布」問題都唔可以短時間內解決到。

另外，Pauline又講到每個人都有自己嘅強項，佢就發現原來自己煮餸都幾叻，佢媽咪仲問佢使唔使開番間私房菜添，阿Ann就隨即響應話想預訂一圍，唔知幾時先會成事呢？

第一手消息請下載on.cc東網iPhone/iPad/Android/Windows Phone Apps