政壇：阿王立會生涯倒數？
話說政府擬於本周三向立法會提交政改方案，早前有消息話，雖然已拍板一六年立法會選舉整體議席數目不變，但因應各區人口變化，港島區預計將會減一席。工聯會立法會港島區議員「阿王」王國興今屆先由新界西成功轉戰港島區，如果港島區少一席，會唔會令佢嘅議席危危乎呢？阿王就話如果政府要減議席都冇辦法，佢會好珍惜喺立法會嘅每一日，每日工作都係倒數咁話。講到咁悲，唔通佢已經打定輸數？
據聞中央已拍板一六年立法會選舉辦法同整體議席數目不變，但因應人口變化，地區直選五區嘅議席分配就需要微調，預料人口不斷下降嘅港島區將由依家七席減到六席，而人口急升嘅九龍西就有望由五席加至六席。阿王今屆立法會選舉由新界西轉戰港島，憑住佢日以繼夜、夜以繼日反「拉布」，令曝光率高企，終能險勝。不過，如果二○一六年減少一席，相信競爭將會大大加劇。
「唔係主觀想點就點」
另外，由於工聯會有不明文規定勞工界功能界別議員唔可以做多過一屆，所以之前盛傳佢哋嘅勞工界議員郭偉強將接替阿王出選港島，阿王就接陳婉嫻棒選超級區議員。不過，嫻姐至今仲未表態係咪退下火線，所以阿王未來何去何從仲係未知之數。唔怪得阿王尋日出席活動時被問到下屆選舉部署，就話政治一日都嫌長，今日唔知聽日事，又講到「有啲嘢唔係主觀想點就點」，要珍惜喺立法會嘅每一日啦！
今屆接替阿王成功取得新界西議席嘅麥美娟對於九龍西加一席，佢就話工聯會當然希望每區都有代表，但佢自己就想留番喺原區服務當區居民。據了解，郭偉強亦都喺港島區同九龍西密密做地區工作，做定兩手準備，但相信一切有待工聯會決定喇！
