海上垃圾為患 清潔香港齋噏
仁者樂山，智者樂水。香港山美水美，碧波海灘聞名全球，可惜吖，由於部分市民缺乏公德心，既唔識樂山，亦唔識樂水，搞到海上垃圾處處，烏煙瘴氣，簡直大殺風景。
係咁嘅，當局最新研究發現，本港每年收集嘅海上垃圾多達一萬五千公噸，其中超過八成源自陸上，主要係畀人從岸邊揼落海嘅固體廢物，多數係塑膠同發泡膠。值得留意嘅係，超過九成半海上垃圾來自本地，只有百分之五係非本地嘅「產品」。
雖然海上垃圾佔都市固體廢物總量僅約百分之零點五，數量唔算好大，但不可不知，海上垃圾嚴重破壞海洋生態，而且呢啲垃圾本來就唔應該出現喺海上。正如環保官員話齋，問題出喺市民亂拋垃圾，公眾意識薄弱，講白啲，即係冇公德心囉。
係人都知，香港係海港城市，保護海洋生態嘅重要性不言而喻，亂拋垃圾，等於自毀家園嘅咋。
嗱，大家只要去附近海灘睇吓就知問題有幾嚴重，尤其係節假日之後，更加慘不忍睹，唔少海面漂滿膠樽及膠袋，沙灘幾乎變成垃圾崗。呢個問題固然同市民欠缺公德心有關，而當局宣傳教育不足亦有好大責任。你知啦，港產官僚搞環保一向虛應故事，清潔香港淪為做騷，唔係雷大雨小，就係虎頭蛇尾，有事大龍鳳，無事話之你，有乜法子唔愈搞愈污糟吖。
呢，早前網上瘋傳一批大學生喺長洲沙灘搞派對，互相狂唧護髮素，唔止嚴重污染海灘，仲留低大量紙皮紙箱、發泡膠碎及膠樽等垃圾，引起全城非議。大學生居然變成海灘垃圾蟲，呢啲咪就係教育失敗嘅結果囉。
最諷刺嘅係，香港人經常批評內地旅客不文明，冇公德心，隨地吐痰，亂拋垃圾，原來係五十步笑一百步咋，絕大部分海上垃圾係香港人自己製造嘅，你話係咪羞家吖。仲有，早排有人異想天開，要求中央同珠海方面協調，撥出孤島畀香港做「垃圾場」喎，簡直係損人利己。
自作孽，不可活，香港淪為垃圾港，一切都係自己造成。咪話太一叮唔提醒吖，三堆一爐計劃話就話已經落實，但如果大家唔識自律，罔顧公德，繼續製造大量垃圾，連三堆一爐都搞唔掂，唔止垃圾圍城噩夢成真，遲早連維港都變大坑渠嘅咋，叮！
