SUN搞作:SUN官場現形記:藍莓風波
本港甲型肝炎個案暴增,感染數字已超去年全年,但係衞生署對瘋傳內地藍莓播甲肝唔多上心,李衞梗要搵署長儀儀質問吓啦……
李衞:喂,好多傳言話內地藍莓有問題,點解拖咁耐先驗?
儀儀:其實我哋都好快手吖,報道一出街,我哋都即刻做嘢,唔係點封住你哋把口?
李衞:哦,即係唔畀人踢爆就唔做嘢啦!
儀儀:唔好咁講,其實我哋強調咗好多次,驗病毒雖然可以做,但可能嘥好多資源又徒勞無功,所以先拖咁耐啫……
李衞:關乎市民健康,點可以用資源同成效做擋箭牌?
儀儀:政府部門都要睇住盤數先得o架!唔係會畀審計抽秤o架!
李衞:想慳水慳力慳資源?好易啫,請少啲你哋呢種高官,乜都慳番晒啦!