立法會議員「長毛」梁國雄年近六十歲，近年成日出入醫院，舊年十一月先至因急性膽痛而叫救護車入院。尋日佢出席財委會審議政府申請四十億三千萬元免息貸款，畀中文大學發展非牟利私家教學醫院時，自爆上星期又見膽痛，原本想去公立嘅瑪麗醫院做檢查，但因為輪候時間太長，焗住今日要去私家嘅寶血醫院做電腦掃描檢查喎。

梁國雄膽痛舊患仍未治愈。

長毛講到嬲爆爆，佢話：「我差唔多死喇，先可以去瑪麗醫院，如果唔係就要畀兩萬，或者一萬五千蚊。」佢怒斥如果一定要喺政府醫院做，咁就呢一世都唔使做喇，所以就算私家醫院收費貴，佢都冇得揀。

近排長毛又的確成日出入醫院，前年十月佢踢波唔小心搞到左腳骨裂，要坐輪椅、拎拐杖成幾個月，加上仲未治愈嘅膽痛問題，睇嚟若果佢冇得睇公立醫院，又冇買保險，咁醫療費真係好襟計。

第一手消息請下載on.cc東網iPhone/iPad/Android/Windows Phone Apps