據聞白鴿黨立法會議員「AV仁」何俊仁辭職引發變相公投一事，已成為泛民「五方會談」嘅焦點議題，有人建議佢應該喺表決前辭職，但亦有人話依家辭職時間太緊迫，未必可以喺政改表決前完成補選，顯示唔到民意傾向，所以有人就建議應喺否決政改後辭職，「公投」時間就同年底區議會選舉相當接近，泛民仲可以藉發動公投炒熱選舉氣氛，甚至推高投票率。因為以往區議會選舉，投票率偏低，泛民相信投票率愈高，對佢哋愈有利。

（設計圖片及對白）

泛民來勢洶洶，政府又點拆彈呢？聽聞政府胸有成竹，因為超級議員辭職引發補選，等同一次大型全港選舉。就算壓縮所有程序，由辭職到補選最快都需時四個月。假如AV仁喺七月辭職，即係同區議會選舉撞正同一個月。但政府已為區選抽調大批公務員協助點票，又借用學校同社區會堂作點票中心。若同日再舉行補選即係要雙倍人手，根本無可能。

欠人手場地 快極要三月

咁有冇可能喺同一個月嘅唔同日子舉行？政府消息人士話選舉通常喺星期日舉行，若依家向學校同社區中心借場，可能最快都要到十二月底至有場，但屆時撞正聖誕元旦假期，政府都係難以抽調人手點票，所以分分鐘要過埋農曆新年嘅長假期。數吓數吓，最快都要明年三月喇！所以政府預料辭職公投呢單嘢分分鐘搞唔成，意味住泛民嘅如意算盤好大機會打唔響。

咁政府預留兩億元用嚟搞補選咪無用武之處？唔怕，立法會主席曾鈺成話唔排除辭職以便護送政改過關，若然係咁，到時都係要搞補選，咁咪啱啱好囉！

第一手消息請下載on.cc東網iPhone/iPad/Android/Windows Phone Apps