到底識投胎緊要啲?定識投資緊要啲?內地超級富豪大連萬達老闆王健林位公子王思聰,最近畀大家知佢唔只識投胎,仲識投資。事關王公子間公司之前認購咗深交所上市公司棕櫚園林嘅一批非公開發行股權,呢排A股牛成咁,棕櫚園林股價已較年初升咗三成,即係王公子坐定定又賺咗幾千萬人仔。

王思聰

不過,王公子今次賺錢,其實又可能關佢位王阿爸事。有內地投行人士分析,棕櫚園林非公開發行對象就九個,個個都來頭唔細,而且發行價又相當低,當撞正升市,賺起嚟唔講得笑。加上萬達有地產業務,估計可能同棕櫚園林有過合作項目喎。

其實對王公子嚟講,幾百萬係碎銀,幾千萬只係散紙。聽講佢一提起要買翡翠畀王阿媽,就話「兩個億也還好吧」。至於女朋友生日,「生日禮物也不貴的,十幾萬吧。不過參加了一個慈善拍賣,買了達明赫斯特的米奇(著名藝術家Damien Hirst嘅畫作),一千五百多萬,當情人節禮物送她了。」

第一手消息請下載on.cc東網iPhone/iPad/Android/Windows Phone Apps