話時話，從政最緊要識做戲，唔少西方國家嘅政客都係做演員出身，較出名嘅有美國前總統列根。原來香港嘅政治問責團隊裏面，都有人做過全職話劇演員，佢就係勞工及福利局副局長Stephen蕭偉強（圖）喇！不過，同好多有志從事演藝工作嘅香港青年一樣，佢最後都係為咗生計放棄演藝事業，轉揸公務員鐵飯碗。

蕭偉強

Stephen透露讀港大時已玩戲劇學會，七八年畢業後第一份全職工作就係喺香港話戲團做演員，演出嘅劇目包括《灰闌記》，飾演所羅門王嘅近身侍衞。當年每部劇薪金得八百蚊，加上唔夠穩定，還完大學學生貸款就冇乜剩。

同當時好多港大天之驕子一樣，Stephen同時申請多份政府工，首選係喺香港電台做助理編導，不過面完試最終冇請佢。之後政府通知佢話請佢做行政主任，月薪二千幾，薪高糧準。佢掙扎一輪後都係決定放棄演藝事業，結果一做就三十幾年，退休後仲做埋問責官員添！

第一手消息請下載on.cc東網iPhone/iPad/Android/Windows Phone Apps