政壇：街邊橫額嘲羅三七
早前學聯改選，新任秘書長Nathan羅冠聰因為以三十七票當選，被質疑同以六百八十九票當選嘅特首一樣，同係透過小圈子選舉產生，仲被揶揄為「羅三七」。Nathan就喺社交網站自爆，畀人喺香港大學同浸會大學附近街邊掛橫額，印住「祝賀學聯羅冠聰37票高票當選」字句同佢張相。雖然橫額上冇尖酸嘅批評，但係人睇咗都知佢畀人玩。
有人喺港大同浸大附近街邊掛上賀羅冠聰「高票」當選嘅橫額。（互聯網圖片）
Nathan話唔驚，亦冇負面情緒，仲自嘲怕自己嘅相貌會嚇怕途人，如果對方要恭賀他，直接留言或發訊息就得喇！有網民就留言話，Nathan應該多謝掛橫額嘅人，免費幫佢宣傳喎。
