政壇：靳叔畫變頸鏈冧太太

靳叔話最初係因為一片銀杏葉飄落地下，觸發佢畫呢幅畫。後來佢將首飾概念加入畫中，咁啱又搵到一粒玉石作配襯，於是就將幅畫變成一條可以戴嘅頸鏈，展覽結束後就會送畀太太。

原來靳太係靳叔嘅「粉絲」，曾經跟佢學畫畫，後來兩人再次重逢先至擦出愛火花。靳叔笑稱太太好支持佢創作，相信太太實好鍾意呢條自創嘅頸鏈。

現場仲有好多由《兒童樂園》嘅人物或場景製成嘅襟章，例如成班小朋友轉呼拉圈、捉蝴蝶、放炮仗等，充滿昔日嘅簡樸生活情懷，呢啲係設計師Benny區德誠嘅大作。Benny話《兒童樂園》係好多人嘅童年回憶，希望市民欣賞完展品可以將快樂感覺帶回家。

本地著名視覺藝術家「又一山人」黃炳培就將百幾年前水務署喺街頭髹上嘅屋形標記，融入做領帶、圍巾同袖口扣等設計，佢話呢個標記係顯示水管資料，依家仲隨處可見，係港人集體回憶，再配上「WE LOVE HK」字樣，令設計充滿本土色彩。