政壇：公文袋傾政改 15分鐘散場
如無意外，「政改三人組」將喺下星期三公布政改第二階段諮詢結果，跟住重頭戲就係提交畀立法會審議嘅最終方案。身兼組長嘅政務司司長林鄭月娥近日陸續約見各黨派，除咗放風同爭取支持之外，另一重任係爭取泛民轉軚投贊成票。尋日輪到見政改立場轉趨強硬嘅公文袋，結果雙方只係會面十五分鐘就散場，名副其實係話不投機半句多。
（設計圖片及對白）
下周發動「反拖住先行動」
公文袋尋日中午派出黨魁「袋巾傑」梁家傑同法律界議員Dennis郭榮鏗見林鄭，據聞袋巾傑黨友、溫和派代表湯家驊本來都話想參加，但袋巾傑就話唔使咁多人去招呼林鄭喎。之後，湯家驊再問多次可唔可以去，但係袋巾傑就始終冇正面回覆，至此湯家驊亦好識趣，冇再追問落去。八卦友話，當電視機直播袋巾傑見完林鄭再會見傳媒情況時，湯家驊啱啱喺立法會餐廳食晏，有人形容湯家驊當時苦笑咗一下喎。
講番袋巾傑同林鄭會面結果，袋巾傑話佢喺會上批評「堂堂一個政府」，唔應該鬼祟挖泛民票，咁擺明係要分化泛民，令市民質疑泛民分裂，動作非常唔光彩。佢又問林鄭係咪同中央疊埋心水等政改被否決，然後就入泛民數，令接連上場嘅區議會同立法會選舉失利。佢話林鄭只係重申全國人大常委會「八三一」決定不能撼動，叫佢哋考慮「袋住先」。
袋巾傑仲話，今次會面後更加確定港人唔應該對中央有任何幻想，不如下定決心否決方案後，再次啟動政改。下星期日泛民會先發動新一波動員，叫「泛民反拖住先行動」，抗衡政府下星期六發動嘅「袋住先」攻勢。
講真嗰句，其實林鄭同袋巾傑見得嗰十五分鐘就散場，唔多唔少都反映咗雙方都唔存在任何幻想。
