孭鑊竟袋二千萬 港鐵貼錢送洋人

太一叮講緊嘅咪就係港鐵前行政總裁韋達誠囉。係人都知，佢管治下嘅港鐵服務每況愈下，有口皆悲，尤其係高鐵工程嚴重延誤，佢監管不力在先，隱瞞事實在後，更加係全城鬧爆。雖然喺民意壓力下，韋達誠被迫提前一年執包袱走人，但對外界盛傳港鐵貼錢送佢走，港鐵一直諱莫如深。

不過咁，紙係包唔住火嘅，港鐵最新一份年報終於解開呢個謎團嘞。原來韋達誠離職時除咗獲發五百八十萬元基本薪金及津貼外，更額外獲得一千五百七十萬元合約結算金，雖然冇攞到與表現掛鈎嘅五百萬元薪酬，埋單計數仍然穩袋二千一百萬元，問你服未。

真係諗極都唔明，港鐵之前調查高鐵醜聞嘅委員會，已經點名批評韋達誠判斷欠佳，要為事件負責，佢提早執包袱其實係承擔責任，即使唔使賠錢，起碼都要「淨身出門」，家陣反而穩袋二千萬元，可以疊埋心水搵另一份工，仲有冇再荒謬啲呀。有人形容港鐵同韋達誠簽嘅唔單止係不平等條約，直頭係城下之盟，真係一啲都冇誇張o架。

咪話太一叮踢爆，港鐵禮送韋達誠，唔係因為有僱主良心，而係對洋人特別厚愛咋。當初港鐵重金禮聘韋達誠，已經引發好大爭議，事關呢位洋大人任職紐約都會運輸局期間，短短兩年劣迹斑斑，尤其係大幅提高票價，更加搞到怨聲載道，當時已經有人警告，請佢返嚟一定冇運行，點知港鐵一意孤行，結果不幸而言中，搞出個大頭佛。

講開又講，港府迷信洋和尚會唸經，早就鬧出唔少笑話嘞。最典型例子係西九文化區，前後三任行政總裁都係洋人，結果醜聞多多，特別係英國人謝卓飛，上任冇幾耐就詐病辭職，點知畀人踢爆喺老家任職；繼任嘅澳洲人連納智，又係以健康理由劈炮。咁都唔止，現任嘅栢志高喺推廣文化藝術方面毫無經驗，但勝在係洋人，仲係同貪曾關係密切嘅退休洋官，結果可以喺離任不足半年就獲委任新職，完全無視退休公務員過冷河嘅規定，引起公眾嘩然。

一句講晒，香港唔係冇人才，而係當局一味崇洋媚外。依家有辦你睇，以為外國月亮特別圓，最終咪添煩添亂，唔衰攞嚟衰囉，叮！