名人陳鴻業同「鋼鐵大王」龐鼎元嘅孫女龐寵貽,尋日出席「香港骨髓基金×新世界環保慈善三項鐵人賽」記者會,陳鴻業話每年都會參加三項鐵人賽,要十九小時內完成游水三點八公里、踩單車一百八十公里同跑全馬,佢話:「我舊年十五小時內完成,今年七月會去加拿大參加,希望十四小時內完成,因為之前去咗滑雪而遲開始準備。」

陳鴻業(右)同龐寵貽齊齊為慈善出一分力。

鋼鐵大王孫女恨參賽

提到係咪兩個囝囝嘅好榜樣?陳鴻業話:「都希望佢哋有毅力,成功係需要毅力,叻唔叻都係其次,大仔五歲、細仔四歲,要準備升小一事宜,已經有心儀小學。」有份統籌活動嘅龐寵貽直言自己都想參加三項鐵人賽,但暫時冇時間,而且踩單車坐得耐會痛。睇怕佢要畀多啲時間鍛煉一吓,先好考慮參賽嘞!

第一手消息請下載on.cc東網iPhone/iPad/Android/Windows Phone Apps