政改方案公布在即,又到「搞事四人幫」密會攪局嘅時候喇!尋日記者又影到壹傳媒集團前主席黎智英(肥佬黎),與另外兩名「搞事四人幫」成員「李漢奸」民主黨創黨主席李柱銘、「民主阿婆」前政務司司長陳方安生,再加上公民黨主席余若薇秘密飯敍。其後李漢奸、民主阿婆及余若薇等人離開時,仲涉嫌知法犯法,五個人坐入一輛私家房車離開,連司機共六人明顯超載。飯敍完再涉嫌犯罪,其中兩個仲係資深大律師添,香港被佢哋咁樣搞法真係冇晒法治!

黎智英夫婦乘座駕,抵達西半山屋蘭士里嘅豪華大廈。

余若薇(前左)與丈夫胡健維(前右)左右扶住陳方安生(前中)落斜路,而李柱銘夫婦(後左及右)則緊隨其後。

五人行到柏道街口,逼晒上胡健維嘅座駕離開,涉嫌超載知法犯法。

兩資深大律師知法犯法

尋日下午約六時半,肥佬黎兩公婆一齊乘座駕去咗位於西半山屋蘭士里嘅豪華大廈,落車時見到兩人拎住束花及一個環保袋,估計裏面載住啲靚酒,之後肥佬黎其中一名兒子亦到場。

到晚上十時正,記者就見到李漢奸夫婦、余若薇夫婦及民主阿婆一行五人從豪華大廈行出嚟。

由於條路相當斜,有名你叫「民主阿婆」嘅陳方安生行得好驚險,幸得余若薇老公醫生胡健維出手相助,扶民主阿婆一把,否則隨時唔係行落去,而係轆落去!

五人行到柏道街口後,胡健維個司機一早駛定車喺度等候,但架車連司機最多只可載五個人,點算好呢?眾人決定連的士錢都慳番,死塞爛塞一齊坐晒入架車度,其中余若薇夫婦、民主阿婆及李漢奸太太四個人逼晒喺後座,最瘦嘅李漢奸反而坐前座。「超載五人組」離去後約五分鐘,肥佬黎一家三口亦坐車離開,真係唔明佢點解唔肯載走其中一人,每架車載五個人,咁咪唔使知法犯法囉!

第一手消息請下載on.cc東網iPhone/iPad/Android/Windows Phone Apps