高鐵香港段工程嚴重延誤惹嚟全城不滿，港鐵前行政總裁韋達誠「孭鑊」後提前一年喺去年離任，外界曾盛傳港鐵係「貼錢」送走佢，但港鐵一直拒透露詳情。港鐵最新一份年報顯示，韋達誠離職嗰陣除獲發五百八十萬元基本薪金同津貼外，仲額外獲一千五百七十萬元合約結算金，雖拎唔到估計約五百萬元嘅與表現掛鈎薪酬，但都「擸走」逾二千一百萬元。有立會議員鬧爆港鐵貼錢請走韋達誠，韋做錯事仲拍吓屁股擸大舊錢走人，但高鐵超支就要市民埋單，港鐵同運房局局長張炳良必須向公眾交代。
