政壇：搞搞政：理大城大陰招阻退聯
喺佔領行動發生後，學聯因決策失誤而盡失民心，唔少大專學生都高呼退出學聯。而學聯早前亦進行改選，由羅冠聰做秘書長。惟繼香港大學同嶺南大學之後，理工大學尋日亦就退聯議案舉行公投，而城市大學同浸會大學嘅公投亦會喺下周舉行。有消息指唔同大學嘅學生會對退聯公投多番阻撓，令人覺得學聯「使橫手」防止港大退聯事件重演。
設計圖片及對白
理大尋日舉行退聯公投，按照會章，要有一千八百個學生會會員參與投票，同時贊成票過半，學生會先可成功退聯。退聯關注組發起人陳浩天批評，學生會內部運作拖延，令到投票到學期尾先可以開始進行，而七日嘅投票期中，有五日係自修日，根本無人返學，佢擔心人流太少，投票率不足，令投票無效。問到學生會故意揀自修日搞公投，係咪有心打壓？佢話一般投票只得五日，經過爭取之後學生會同意今次投票延長至七日，「都好過無」。
雙學變臉拒撐AV仁辭職
原來城大退聯投票亦爆出打壓傳聞，城大退聯關注組前日喺社交網站批評，學生會以「下三濫手段」打壓退聯投票，怒斥學生會用「黑底黑字」印製宣傳退聯投票海報，令同學根本睇唔到有關退聯投票詳情。城大學生會回應話已收到同學意見，話會改善喎。
有傳泛民主派對於學聯嘅同學仔都好不滿。由佔中三子、雙學、泛民同民間團體組成嘅五方平台前日開會，據了解，泛民同雙學就白鴿黨立法會議員「AV仁」何俊仁辭職搞變相公投一事「傾唔埋欄」，由於辭職公投需要投入大量人力物力，白鴿黨要求五方各派人幫手，但學民思潮就拒絕派出人手，而學聯又拒絕出錢，搞到白鴿黨人好不滿。記得喺佔領行動期間，雙學一直主張辭職公投，依家又唔支持白鴿黨搞，反映五方平台各懷鬼胎，成盤散沙，真係做鬼都唔靈！
