政壇：中出揀立會代表歎慢板
明年立法會選舉，各黨各派正積極部署，連帶功能界別都物色代表參選，但進出口界議席仲未定到人選。中華出入口商會（中出）副會長兼秘書長陳勁話，無論係後生或老年嘅會員都有意服務社會，亦希望多啲人加入議會為業界發聲，但重申一切都要考慮大局，明年先可以敲定。佢強調無論係商界或政黨背景嘅代表，只要係進出口界立法會議員，當有意見分歧時就一定要以業界利益行先。
中華出入口商會將舉辦第二屆進出口企業大獎，規模較舊年大一倍。
力撐一周一行利入口
內地當局周一正式宣布收緊深圳戶籍居民「一簽多行」政策，改為「一周一行」，正當零售業叫苦連天之際，中出卻力撐有關政策。會長張學修話過往受到水貨衝擊，商家對入口貨嘅意欲大減，依家嚴打水貨客反而令到深圳對香港貨物嘅需求增加，貨物可從正常途徑入口，對行業有正面影響。
另外，中出將會舉辦第二屆進出口企業大獎，該會常務會董彭楚夫話，今年規模比舊年大一倍，希望藉此吸引國內同國際企業參加，成為中出嘅品牌同重點項目。
