政壇：橄欖換新車要睇電費單
話說上星期股市升到嘭嘭聲，唔少股民都豬籠入水，有人仲聲稱賺到首期買樓添！我哋發現立法會議員「橄欖」陳鑑林最近豪擲七十幾萬元買咗部美國新款電動跑車，莫非佢喺股市中獲利，所以買車獎勵自己？橄欖就話半年前已睇中呢部車，計番時間應該唔關股票事，但等呢架車就等到頸都長。
陳鑑林花七十幾萬買咗部美國電動跑車。
橄欖部新車同依家好多房車一樣，唔需要撻匙就可以啟動摩打，行駛嘅時候仲非常寧靜，而且充一次電就可以揸一星期，論性能表現佢相當滿意，唔怪得舊年十月時已一見鍾情。雖然橄欖強調新車符合環保潮流，但就可能因為叉電而大大提高屋企嘅電費，佢話等電費單寄到屋企先知道可以慳番幾多油錢。
另外，金融服務界議員「肥老闆」張華峰上星期亦憑港交所股票賺到笑，據聞唔少建制派議員都要佢請食飯，而且反應非常踴躍，大家爭住報名。肥老闆亦好闊佬，話餐飯嘅資金冇上限，但就要由漁農界議員「高佬賢」何俊賢搞掂喎，咁高佬賢記得柯打定「排翅撈飯」畀肥老闆嘞！
