唔剷聯網山頭 乜嘢改革都假

呢，港府兩年前成立醫管局檢討督導委員會，話要全面改革醫管局，拖到依家終於有聲氣嘞。身兼委員會主席嘅食衞局局長高永文日前透露，報告已經大致完成，最快年中提交立法會，又話諮詢期間聽到唔少意見，包括聯網資源唔按人口比例分配，造成唔公平、服務輪候時間過長等。

如果大家嫌官僚三幅被太悶，可以聽吓醫學會點講。佢哋直指醫管局充斥山頭主義，聯網唔單止冇合作，反而為爭奪資源無所不用其極。最離譜嘅係，有間醫院白內障手術輪候時間縮減至零，於是提出幫輪候時間長嘅醫院分擔病人，點知被一口拒絕，原來對方係擔心病人不足會被削減資源。亦有人踢爆，醫管局購買先進儀器，次次都係得幾間龍頭醫院有份，其他醫院就得個睇字。公共醫療系統黑幕重重，真係做戲都冇咁誇張。

講真，資源分配不均嘅又點止儀器咁簡單吖。家陣新界西聯網平均每千人得零點六個醫生咁大把，而九龍中及港島西就每千人分別有一點三及一點一。仲有吖，有啲地區嘅醫院科室齊全，設備先進，有啲就只得小型診所，連醫療服務都係貧者愈貧，富者愈富，問你點頂！

咁都未算喎，醫管局行政架構臃腫，將多兵少，前線醫護十個煲得七個蓋，做到踢晒腳，搞到事故頻生。計太一叮話齋，與其肥上瘦下，不如大削高層職位，將慳番嘅錢用嚟提升服務好過喇。

當然啦，公共醫療嘅病徵就係人都知，開咩藥至係關鍵所在。醫學會建議採取「錢跟病人走」方案，以人口比例、實際工作量等因素分撥資源；又建議聯網總監同各醫院行政總監每六年轉換一次，而醫院部門主管就改行固定任期合約制，並且唔可以連任。呢劑藥方斷唔斷到尾就唔知，大家淨係知山頭一直存在，爭奪資源嘅分餅仔遊戲就會繼續落去，充其量只係權力重新洗牌咁解啫。再講吖，家陣已經係互聯網時代，公立醫院病歷等資料早就互通，已經冇必要再靠聯網做到互通有無啦。

點講都好喇，公共醫療系統烏煙瘴氣，亂象多多，係時候進行一場觸及筋骨嘅大手術嘞，依家就睇高局長嘅「醫術」夠唔夠高明嘞，叮！