城中鏡：下拍拍：李小加薪酬隨時全球最高
港交所股價愈升愈有，尋日最高見過三百蚊，除咗有貨嘅散戶會興奮到合唔埋嘴外，估計港交所行政總裁李小加可能都忍唔住偷偷哋笑，事關佢份人工除咗底薪同花紅外，仲包埋獎授股份（即係獎啲港交所股份畀佢），佢呢幾年收埋收埋唔少，到家陣……仲唔哈哈哈。
港交所股價升幅大，令李小加嘅人工亦隨之增長。（資料圖片）
獎授股份和味
睇番港交所年報，小加一四年薪酬連表現花紅及福利近二千萬元，都未計獎授股份，咁舊年獎咗幾多股港交所畀佢？睇番資料，小加現擁有575,840股港交所權益，以尋日收市價計，批股份值成1.71億元！據聞小加幾乎唔會自己買港交所股份，若呢批值成1.71億元嘅股份係獎番嚟，加埋舊年二千萬底薪花紅，佢嚟自港交所嘅身家至少1.91億元！
小加收入高得過和黃大班霍建寧未呢？霍大班舊年酬金約1.96億元，噢，小加仲差少少添！
證監會行政總裁歐達禮舊年年薪約九百零三萬；而金管局總裁「攞命陳」陳德霖舊年續任，舊年固定年薪六百五十萬元，加埋佢按表現決定嘅浮動年薪上限二百六十萬元（佢無理由攞唔到上限嘅），再加佢公積金等福利估計，應該唔會少過前年嘅近一百四十萬元，咁攞命陳全年酬金估計約1,050萬元。呢個回合，小加贏喎！而納斯達克CEO格賴費爾德二○一三年酬金大約1.07億港元，紐交所前CEO尼德洛爾同年都有大約1.02億港元，倫敦交易所CEO羅列特舊年年薪就大概7,422萬港元。照咁睇，若果港交所股價Keep住升，小加份人工完全有機贏晒全世界！
