香港大學首位華人校長黃麗松日前離世，當年獲黃麗松邀請擔任第一任女副校長嘅楊紫芝尋日接受訪問，提起當年逸事感受良多。楊紫芝透露，黃麗松係個頗嚴肅嘅人，但佢無論對住同事或同學均好有耐性，猶記得七十年代有個英文十分好嘅學生會會長鍾意着條穿窿褲同踢拖返學，八十年代則有個英文不太好嘅學生演講，令佢同着重語文能力嘅黃麗松都「聽出耳油」，但黃校長依然極盡忍耐。

楊紫芝

黃麗松（右）一生醉心小提琴，鍾意宴客時即場演奏。（黃麗松珍藏相片）

黃麗松在1944年於牛津大學進修時所拍攝。（黃麗松珍藏相片）

講到對黃麗松最欣賞嘅地方，楊紫芝盛讚黃嘅語文能力一流，用簡練文字就可表達到精確意思，處事公正令人信服，加上喺港大捉襟見肘嘅艱難時期，黃仍能令港大向前發展，大家都好尊敬佢。黃麗松亦有感性一面，話說佢係個重視家庭嘅人，除咗試過公開致辭多謝太太，有次起床發現唔見咗個大仔，仲即刻打電話畀楊紫芝，問佢知唔知阿仔去咗邊。原來阿仔連早餐都唔食，同緊楊紫芝一齊去咗巡病房。

黃麗松醉心小提琴，退休後第一時間跟名師學藝製作樂器，其中一個製成品喺港大珍藏，鍾意宴客時即場演奏。

第一手消息請下載on.cc東網iPhone/iPad/Android/Windows Phone Apps