城中鏡：神秘善長月捐百萬
早前仁濟醫院舉行新一屆董事局交接典禮，卸任主席嘅蘇陳偉香交棒畀新任主席Vanessa林煒珊。蘇太任內共籌得逾二億元善款，創下歷史紀錄。成績咁好，原來係多得一位神秘善長以好特別嘅方式支持，算係一時佳話。
蘇陳偉香（右）任內籌款創新高，接棒嘅林煒珊笑言壓力大。
鄭承峰自嘲係股海「明燈」。
羅穎怡（右）搵利承武齊加入仁濟醫院大家庭。
蘇太話自舊年五月起，董事局每個月都收到一位無名氏寄來一張一百萬元支票，用以支持醫院重建工程，至三月底已累計收到一千萬元。佢哋多次嘗試接觸呢位善心人士，但對方始終不願曝光。蘇太話三月份呢位善長捐款倍增至二百萬元，結果令總籌款數字一舉突破二億元，令人十分振奮。
林煒珊接莊難忘
接棒做主席嘅Vanessa笑言壓力好大，所以今年會着重推廣仁濟作為慈善企業形象。佢話爺爺林百欣有份創辦仁濟醫院，爸爸林建名就做過仁濟醫院主席，所以今屆輪到佢接莊，係佢人生難忘嘅一頁。今屆董事局有唔少新面孔，包括城中望族利希慎家族後人利承武，佢話係Vanessa同總理羅穎怡搵佢加入，佢好認同Vanessa嘅理念，所以就爽快答應。
近期股市牛氣沖天，仁濟第一副主席鄭承峰笑稱自己係股海「明燈」，所以好少炒股。今屆佢兼任仁濟籌募委員會主席，唔知有乜嘢「吸水」大計？佢話今年將會整合大大細細嘅籌款活動，以便節省行政支出，將善款用於實處。依家已有籌款嘅初步諗法，但就肯定唔會投資股市喇！
