政壇：搞搞政：白鴿退黨海闊天空 李漢奸烏鴉口倒米

李漢奸喺研討會上話，英國旗下、中國旗上，已代表落實「一國」，反而「兩制」就因為冇「真普選」，香港人唔可以當家作主，乜都要聽晒中央「阿爺」話。跟住佢就話，中央一直以來都冇理會民主派政治地位，明明泛民得票多於建制，喺議會都只係少數，所以話好多人離開白鴿黨之後，反而變得發達、海闊天空。既然退黨咁好，點解李漢奸又唔退黨呢？反而喺度噏三噏四？

其實白鴿黨經歷上次政改方案後，已令唔少黨員出走，今次李漢奸多口咁講，會唔會預視該黨又再面對分裂局面？佢又話雖然被人鬧係漢奸，但搵嘅錢都係由做執業資深大律師搵返嚟，唔似有啲人靠口講「愛國愛港」就有錢。估唔到李漢奸無的放矢，似乎侮辱緊「愛國愛港」嘅市民喎。

黃成智受壓辭中委

其實，就連白鴿黨員都不甘受辱。黃成智最近多次高調發表政改「袋住先」言論，惹起部分黨友不滿，據悉該黨內另一中委許智峯除向黨紀律委員會投訴佢嘅言論外，更打算引用黨規凍結佢黨籍。據悉，佢氣憤下已去信黨中央，表明辭去黨中委職務，但保留黨員身份。

講開政改「袋住先」，泛民飯盒會再次搵二十三名成員第三次聯署，話會否決人大「八三一」框架下嘅政改方案。對於近期有傳政府搵溫和泛民「撬票」，飯盒會召集人「袋巾傑」梁家傑就否認，仲斬釘截鐵話泛民會否決方案。白鴿黨單仲偕亦話已透過中聯辦向中央重申，唔會接受人大「八三一」決定，呼籲向權力一方游說。不過，民協馮檢基就透露曾叫過政制及內地事務局副局長劉江華搵京官同佢商討政改，似乎泛民嘅立場唔係咁實淨喎。