政壇：名牌大學畢業任教 金立群虎父無犬女
亞投行無論係政治層面或者經濟層面都極受關注，人人都估亞投行行長個位邊個做，現任亞投行多邊臨時秘書處秘書長金立群係大熱之一，人紅自然多人想識，各方一輪「人肉搜尋」後，近排就發現金立群位八十後千金，原來都值得關注，事關囡囡聰明不下於阿爸，通曉四國外語，而且仲係一位氣質美女。
金刻羽通曉四國外語，而且仲係一位氣質美女。（互聯網圖片）
金立群位千金叫金刻羽，雖則話「成功需苦幹」，但要喺超級名牌大學畢業，相信亦要付出超級努力，金刻羽二十六歲時已經攞到哈佛大學經濟學博士學位，佢依家三十二歲，已經喺倫敦大學經濟學院任教，係學院內最年輕嘅宏觀經濟學教授。
金立群有個外號叫做「金融外交家」，囡囡金刻羽讀書時實習嘅地方亦都非常國際化，包括摩通、大摩、高盛、法巴等國際投行、世界銀行、美國聯儲局等。佢仲通曉英文、法文、西班牙文同意大利文。聽聞佢當年只係用咗兩年就完成咗哈佛所有本科課程。
