政壇：何建宗返娘家集思會助青年
前年因為冇申報家族公司喺新界古洞發展區持有地皮，最終倉皇辭職、離開官場嘅發展局前政治助理何建宗，除咗任清華大學法學院訪問學者、全國港澳研究會會員，最近仲重返香港集思會，擔任總研究主任。其實何建宗入官場之前，都做過集思會首席研究主任，所以今次只係返回娘家啫！
何建宗（右）重返香港集思會，尋日發表有關青年人處境及訴求研究報告。（受訪者提供）
集思會尋日發表青年人處境及訴求研究報告，訪問一千五百名十五至三十九歲青年，有三成受訪者不滿或非常不滿社會現況，半數支持去年佔領行動，四分一受訪者仲話會再參與類似事件。受訪者中最關注社會議題都係住屋，包括壓抑租金或樓價、多建公屋或居屋，提高整體房屋供應。今次報告真係開正何建宗嗰瓣，相信佢可以為集思會提供多啲土地規劃嘅意見喇！
另外，報告亦顯示青年最重視嘅係核心價值，依次係廉潔、自由、公義和法治；四成一受訪者認為政黨或專業人士可以代表佢哋；四成對香港要維護國家安全保持中立；只有兩成對到國內工作或升學有興趣。
