政壇：工聯會換屆會長理事長冧莊

尋晚工聯會改選領導層，並誕生新一屆領導層，其中林淑儀、吳秋北成功冧莊做會長同理事長；至於副會長同副理事長，除咗一班熟口熟面嘅人，好似黃國健、陳有海、潘佩璆等，亦換咗啲新面孔，新當選嘅副會長有黃國及周聯僑，副理事長就有孫名峯、陳鄧源及梁芳遠。

連任會長嘅林淑儀（左三）希望出選年底區選嘅人數同當選嘅人都比上屆多。

工聯會尋晚選出第三十六屆領導層。成功冧莊做會長嘅林淑儀對嚟緊區議會選舉似乎充滿信心，佢話上屆有三十一人當選區議員，希望今屆出選同當選嘅人都比上屆多，但具體出選人數及選區仍未敲定。

工聯會爭取標準工時多年，但立場不時受到批評，林淑儀話佢哋喺爭取勞工權益上唔會褪軚，但同時強調爭取權益唔係打交，亦唔係上電視講兩句咁簡單，要有理有節，以及積極聽取工會意見，希望改善工時長同加班補水嘅情況。