政壇：六四遊行改路谷人數

我哋問過支聯會前主席兼立法會議員李卓人，佢就死撐話呢個方案討論多時，但考慮到遊行隊伍難以由維園行去中聯辦，主辦單位亦唔想放棄銅鑼灣，所以一直以來都冇實行。至於點解今年突然決定改變路線，佢話因為政府唔會將民眾嘅聲音反映畀中聯辦，所以佢哋將會親身行去中聯辦表達「平反六四」嘅訴求，藉此將焦點集中喺中共政權喎。佢又話希望透過改變路線，刺激更多人參加遊行，似乎默認過往嘅參加人數唔理想。

學聯擬退出 雪上加霜

另外，佔領行動衍生唔少激進團體，部分人聲言保住香港比平反六四更重要，甚至話唔想參加支聯會舉辦嘅燭光晚會。咁支聯會係咪因為避免受到呢啲團體狙擊而改變遊行路線呢？李卓人就話唔擔心，仲話要狙擊去到邊都會狙擊，相信一般市民唔會反對悼念六四。至於反對或對六四冇感情嘅人，就唔好嚟喎。

除咗遊行路線，今年支聯會仲要面對另一個問題，就係香港專上學生聯會（學聯）可能退出支聯會，認真係雪上加霜。事實上，港大年初成功退出學聯後，港大學生會嘅時事委員會已經打算喺今年六四另起爐灶，籌備校內悼念活動，同支聯會搞嘅維園晚會分庭抗禮。

支聯會講就話尊重學聯嘅決定，仲話會依足程序，只要學聯嘅全民公投通過退出支聯會，再交一封信通知，咁學聯就會被剔除於支聯會嘅成員名單外，講到好似好簡單咁。話雖如此，學聯始終係支聯會嘅創會成員，假如真係退出，對支聯會本身同平反六四嘅理念，點都造成打擊，睇嚟要拆彈真係唔簡單。