寶琳站C出口塞爆港鐵懶理
【記者蘇敏婷報道】港鐵寶琳站設有三個出入口，但人流卻永遠集中在位於地面、鄰近寶林邨的C出口，繁忙時間即變得水洩不通，不少居於寶林邨的長者及傷健人士坦言難以出入，認為港鐵可改善車站設計，以分散人流。然而，港鐵卻堅稱各出入口已能應付需求，反建議居民上落天橋、利用其他出入口進入大堂。地區人士批評港鐵拒絕改善車站設計之餘，反要居民「兜大圈」才能乘車，明顯未有考慮老弱居民需要。
A出口
對比起C出口，A出口人流明顯較少。
C出口
每天繁忙時間C出口均擠滿學生及上班族，現場變得水洩不通。
高永聯批評港鐵無意改善車站設計，未有顧及老弱居民苦況。
居民吐槽
曾先生：「如果由寶林邨去搭港鐵，A出口要上上落落，C出口又太多人，對用輪椅嘅人真係好唔方便！」
趙小姐：「啲人逼晒同一個出口，既然附近咁多樓，應該要多番個出口，做番好啲配套設施！」
港鐵寶琳站現有三個出口，當中C出口位於地面，且鄰近多個屋苑及學校，故人流亦最多，而居於附近屋苑的居民如需使用A、B出口，則必須上、落天橋或穿過商場，故此人流亦相對較少。家住寶林邨的鄧先生指出，隨着區內人流日增，C出口每逢早晚繁忙時間亦被學生與上班族擠得水洩不通，令到邨內長者及傷健人士難以進入大堂，認為港鐵應該研究改善，「港鐵自己都寫C出口係通去寶林邨嘅，但成日塞到爆，老人家點同佢哋逼？」
倡建新出口紓緩人流
鄧先生續指，由於車站的斜道亦設於C出口，傷健人士難以避免使用該出入口乘車，但人流過多亦令輪椅使用者產生莫大不便，「唔好講坐輪椅嘅或者老人家，就算普通人都逼到好似沙甸魚咁，寶林邨又多老人家，其實個車站地面都仲有好多位，點解唔加多個地面出口或者擴闊C出口？」
港鐵發言人表示，目前寶琳站各出入口均能應付乘客需求，又稱根據觀察，認為C出入口人流大致暢順，強調車站職員亦會不時留意車站的運作情況，按需要作出合適的人流管理措施。發言人又稱，現時寶林邨居民可使用A出口要步行約五分鐘進出車站。
不過，記者曾親身體驗港鐵之建議路線，發現從A出口出發，先要從大堂乘搭長電梯經過新都城商場，再橫過天橋走一段路，才可到達寶林邨商場，並需要走兩層梯級才返回地面，對於長者及傷健人士而言可謂甚為困難。
「好明顯就係當年港鐵設計車站嗰陣，估計人流方面出現咗錯誤，佢哋唔肯改善不特止，仲要居民走上走落、兜個大圈先上、落到車，你話咩道理？」將軍澳住區聯會主席高永聯批評港鐵漠視區內老弱居民利益，又指過往曾建議港鐵利用站內外其他空間建造新出口，以紓緩C出口日益增長的人流，卻不獲接納，「港鐵覺得呢個建議唔可行，咁就應該提出其他可行嘅改善方法，而唔係一路由得個問題嚴重落去唔理！」
逢星期一至五見刊
熱線3600 9988
電郵 socserv@on.cc
傳真3600 9900
WhatsApp/SMS 6500 6500
來函請寄：香港大埔工業邨大昌街23號東方報業中心東方報業集團投訴組收
個人資料絕對保密
匿名投訴恕不處理
