膠袋徵費全面實施近兩個星期,效果係點?「東方報業民意調查」顯示,唔少消費者對新例了解不足,感到無所適從,更批評港府一味靠收費搞環保,治標唔治本。難為官老爺仲話效果唔錯,自我感覺良好添。

環境局局長黃錦星交功課,話新例實施頭十日共發出二十個口頭警告,情況可以接受,仲話會加強宣傳力度,當局亦聘請數十人定期「放蛇」,下月會正式展開檢控喎。即係咁,減少浪費,人人有責,膠袋徵費唔係話唔好,但相關措施一定要清晰易明、有可操作性至得,如果措施漏洞多又欠宣傳,要商舖同顧客估估下,成效肯定大打折扣。

講到無所適從,其中一個問題係,部分貨物獲豁免,但界限存在灰色地帶,容易引起誤解。例如新例之下購買冰凍飲品可獲豁免收取膠袋費,但有便利店只提供免費平口袋,而隔籬士多就免費提供手挽膠袋;又例如,濕貨可獲豁免徵費,但市民同時購買乾貨及濕貨並放入同一個膠袋,商戶唔收費就會犯法。咁即係點?即係整個陷阱叫人跳囉。

「東方報業民意調查」反映市民嘅憂慮,兩成七受訪者話唔理解新收費,無所適從;兩成八認為減少棄置膠袋目標成疑;近三成指分辨收費同豁免有難度。有環保組織踢爆,港府年初至開始宣傳,力度嚴重不足。喂,膠袋徵費第一階段早就實施嘞,全面徵費亦講咗好多年,今年初先宣傳,有冇遲啲呀。

嗱,措施漏洞百出,宣傳嚴重不足,結果咪搞到亂晒龍囉。商戶各師各法,有啲收咗費之後再以其他方式回饋消費者,有啲乾脆賣大包,三個膠袋收一蚊,有啲飛擒大咬每個袋收五蚊,無奇不有。咁就難怪,近四成受訪者批評收費五花八門反映措施存在漏洞;一成七指環保大打折扣。最搞笑係,全面徵費實施後,膠袋訂單少咗一成,但紙袋訂貨量就急升兩成,同環保目標背道而馳,簡直「右手打左手」。

冇符喇,港產官僚冇嘢叻,最叻獨沽一味徵費。膠袋、垃圾、玻璃樽同電器樣樣徵費,統統市民埋單,從來唔見港府有乜承擔。呢,三成受訪者指港府環保齋靠收費係治標不治本;近兩成批評當局環保欠長遠之計。你話嘞,港府連膠袋徵費咁小事都搞到一塌糊塗,指望佢哋搞環保救地球喎,發夢都冇咁早啦,叮!

第一手消息請下載on.cc東網iPhone/iPad/Android/Windows Phone Apps