紀惠集團副主席Jacinto湯文亮因細價樓爆煲論一炮而紅,近排人氣高漲,佢嘅網誌成日成為網絡霸氣潮文。早兩日我哋喺一個晚宴上見到Jacinto,佢笑稱除咗亞視之外,搵佢嘅傳媒多到不得了。遲啲佢應一間大學邀請去講樓市,結果通告一出即告爆滿,校方話畀佢知,連諾貝爾獎得主都唔夠佢受學生歡迎喎。

湯文亮嘅網誌經常成為網絡潮文。

Jacinto話寫咗網誌五年,每日寫兩篇,今次因為一篇爆煲論而聲名大噪,確係始料不及。日日寫兩篇網誌?真係少啲靈感都唔得,佢笑笑口話冇難度,會趁游水時度好題材先,然後大約用一粒鐘就寫掂兩篇文章喇!

近排股市牛氣沖天,有網民話按咗層樓去炒股,Jacinto提醒話如果層樓按咗畀財務公司,息口唔低,加上內地資金來得快亦走得快,風險都唔細,勸股民都係小心啲好。

第一手消息請下載on.cc東網iPhone/iPad/Android/Windows Phone Apps