城中鏡：曹星如方力申決戰街跑
曹星如同「運動健將」「小方」方力申近日為某化妝品牌拍攝短片，兩位冠軍級人馬喺西環海傍街跑時互相較量，同時大談冠軍路上嘅挑戰。「男人三十而立」，小方同Rex分享各人獨當一面及時刻保持魅力嘅男人經。
曹星如（左）同方力申在片中較量街跑，仲大談冠軍路上嘅挑戰。
小方同Rex惺惺相惜。
曾經係香港運動員嘅小方同Rex首次見面，二人惺惺相惜。睇到Rex密密出拳，拳拳有力，小方即被嚇到，表示：「我有睇過佢比賽，感覺好勇猛，以為Rex係一個嚴肅又惡嘅人，原來私底下嘅佢既友善又搞笑，經常同工作人員開玩笑，擂台上下簡直判若兩人！」二人仲即場Selfie添！小方提到特別欣賞Rex對運動嘅熱誠同謙虛嘅態度，直言拳擊對自己而言難度太高，仲笑說因自己係演藝人，少不免要靠個樣食飯，所以若有機會打拳要勸對手千祈唔好傷到佢塊面喎。
西環碼頭鬥到山頂
隨後佢哋到西環碼頭拍攝街跑，跑到山頂時Rex坦言非常欣賞小方一身結實嘅肌肉，佢話：「要練成呢個效果，佢（小方）一定下咗很大苦功，雖然都好羨慕，但可惜自己要保持適當嘅體重參加比賽，所以唔可以操成咁。」
作為香港職業拳手第一人，Rex直言呢個名銜絕對得來不易，佢話現正加緊訓練為今年七月嘅國際拳賽積極備戰，實踐自己練拳生涯嘅終極目標，衝擊世界冠軍。佢深信成為世界冠軍會有助向本地青年推廣拳擊運動。
