政壇：搞搞政：阿爺心水冇人貼中

今次冇政黨可以話自己「成功爭取」，真係被玩謝喎。

我哋翻查過各政黨叫價，發現無一個政黨可以成功估中，有啲政黨估輸幾條街，好似白鴿黨估一簽八行，太過辣。富貴黨黨魁兼立法會批發及零售界議員方剛就話一日一行，即係一周七行，就太過寬鬆。而工聯會本來叫「一簽數行」，被人逼迫後先提出「一簽二行」，結果又「撻Q」。

建仔就以大包圍策略建議收緊至「一簽若干行」，即係開大開細開圍骰都係佢贏，呢招咁無賴，所以唔應該當佢成功爭取。反而最貼近呢個結果嘅要數新民黨田北辰，佢早前喺兩會期間提出收緊至「一簽三十行」。

反映中央「冇路捉」

至於一眾本土派陣營人士，例如北區水貨客關注組梁金成、人口政策關注組譚凱邦同新民主同盟范國威，就要求取消一簽多行，叫價太高，當然被莊家通殺啦！但佢哋志在表態，應該無諗過要成功爭取。

今次「買大細」遊戲，無一個政黨成為最終大贏家，有心水清政界人士就話，以往建制派通常會收到風，但今次連佢哋都估唔贏，反映到中央出手「無定向加無路捉」。照咁睇，唔知政改會唔會又係咁呢？