政壇：曾德成遊囚室借題發揮
民政事務局局長曾德成喺「六七暴動」時，因派發反殖民地傳單而入獄兩年，年多前喺佔領行動前，佢再被問及此事時更反問「何犯罪之有」。佢喺最新網誌又借題發揮，自爆早前曾到南非已故總統曼德拉被囚、位於南非羅本島嘅博物館參觀，而舊年初喺香港更曾憑弔數名當年被強行囚禁，但已身故嘅愛國朋友，唔知曾德成對於數十年前因愛國入獄兩年，係咪心有不甘呢？
曾德成喺曾囚禁曼德拉監獄前留影。
曾德成呢篇網誌以「博物館，功能珍貴」為題，指曼德拉當年囚房如今開放畀公眾參觀，加上博物館安排曾被囚嘅人士做導遊，形容今天前往參觀嘅遊客，或多或少都懷住崇敬之情。佢話舊年初「憑弔」數名朋友，指佢哋當年被強行囚禁喺原摩星嶺集中營，但佢哋冇犯過傷天害理罪行，只係為咗愛國，卻畀港英殖民政府不經審訊關押，而且囚房內二十四小時電燈長開，令囚房中人承受不斷受監視嘅巨大心理壓力。曾德成突然咁感觸，莫非仲對當年留案底耿耿於懷？
