白鴿黨嘅老鴿同乳鴿早前因為機場興建第三條跑道有爭論,反對起三跑嘅一班乳鴿包括區諾軒仲發起聯署,同贊成興建嘅老鴿「單雞」單仲偕打對台。尋日兩人出席一個活動時,雖然同台但就有咁遠企咁遠,唔知係咪心中存芥蒂呢?

高達斌(左起)、傅振中、李偲嫣同黃之鋒、張秀賢、羅冠聰喺台上握手。

話說主持人搵咗好多關注三跑嘅人士上台,其中包括區諾軒同單雞。眾人上台後,都集中企埋一邊,唯獨區諾軒自己一個人企另一邊,唔知係咪想同單雞劃清界線。區諾軒同單雞事後都話冇乜芥蒂,只係小事一樁喎。

主持人又繼續玩嘢,特登搵學聯秘書長羅冠聰、學民思潮召集人黃之鋒、中大學生會前會長張秀賢、愛港之聲主席高達斌、保衛香港運動發起人傅振中同正義聯盟召集人李偲嫣同台講嘢,呢個組合當然引起台上台下熱烈關注,期待擦出火花,台下都有唔少人對三名學運中人柴台。不過,主持人最後都叫雙方握手,和氣生財好啲。

第一手消息請下載on.cc東網iPhone/iPad/Android/Windows Phone Apps