政壇：温和泛民論政 三分一人甩底
依家政改踏入敏感時刻，政圈中人動作又開始多咗，最近泛民溫和派聲音突然大增，唔少泛民中人都叫泛民「袋住先」，氣氛非常詭異。連曾經講過只理民生議題嘅立法會議員湯家驊，最近都活躍番，仲主動拉線做中間人。湯家驊尋日搞咗場頭炮，由溫和派泛民組成論政平台，閉門討論香港政治出路。平台本身請咗好多政界中人同學者，但最終有三分之一應邀人士突然甩底，唔知呢啲係咪叫出師不利呢？
（設計圖片及對白）
湯家驊同公文袋貌合神離好耐，一直有傳佢會退黨，甚至另起爐灶。尋日佢牽頭搞呢個論政平台，當然無請任何公文袋中人，反而請咗同白鴿黨一樣貌合神離嘅狄志遠，仲有已退出公文袋嘅司馬文。出席人士左中右都有，例如多位大學學者宋恩榮、王于漸、葉健民同陳祖為等，宋同王分別係「十三學者」成員，屬於溫和派人士，曾經建議中間落墨方案畀中央，可惜石沉大海。而葉同陳就與泛民相熟，陳更被指曾為學聯背後秘密軍師出謀獻策。
光譜闊到容納建仔
呢個平台唔止泛民同中間派，連身為建仔黨員嘅香港可持續發展研究中心創辦人朱兆麟，尋日都畀面應邀出席，足證湯家驊呢個論政平台，政治光譜真係幾闊。
但理想與事實始終有距離，湯家驊一心想做中間人，凸顯理性溫和聲音，但似乎唔係人人領情，亦可能有人怕「見光死」。尋日呢個論政平台出席人數始終不及預期，有近三分一人突然甩底，只得十六人出席。湯家驊話經傳媒高度曝光，嚇怕唔少人喎。但佢隨即慨嘆，話又唔係作奸犯科，點解連開會都咁驚呢？開第一次會都咁多阻滯，如佢想將論政平台變智庫甚至組黨，睇怕都幾大阻力。
