政壇：鬍鬚曾講「股」轉口風
港股近排進入大時代，上周短短兩個交易日爆升兩千多點，股民心情興奮，唔少人仲計劃大手投資、搏殺一番。不過，唔少投資有道嘅城中名人就態度轉趨謹慎，連幾日前曾經話過本港股市「好實質」、冇泡沫嘅財政司司長曾俊華尋日都改口，話依家股市波動大，風險高，呼籲投資者、尤其係小投資者要小心呀！
設計圖片及對白
早兩日股市急升時，鬍鬚曾仲顯得好鎮定，認為港股唔見有乜過度炒作，表現穩固，不過，尋日佢結束上海行程回港後，口脗即刻唔同晒，呼籲小投資者小心嘅說話都重複三次咁多，好似想為熾熱股市降溫咁，唔通佢喺上海期間收到乜嘢風？
王國強：「貪字得個貧」
我哋就股市問題再問吓行政會議成員李國章，佢就話，個人睇好港股嘅後市，預測年底可創新高，但就提醒小股民入市前必須做足功課：「世界各地嘅財金官員講嘢，都無話一定準，入市前要睇清睇楚，千祈咪買大開細、買細開大。」
股市成為熱話，多名政商界名人講起件事都顯得審慎。譬如廣東社團總會榮譽主席王國強就話，佢輸唔起，所以無膽高追：「保本最緊要，我怕貪字得個貧嘛！」佢仲提醒散戶，見好就收。
潮屬社團總會主席陳幼南就話，今次升市來得好急，佢至今都感難以置信：「如果上星期有人同你講，話港股嚟緊會升二千幾點，你一定以為佢黐線，但事實真係升咗好多。」不過，咁樣急升之後，佢已經唔敢追貨，事關佢一向投資前訂好目標，達標就沽貨，再升都唔會貪。同樣選擇唔追貨嘅仲有福建社團聯會榮譽主席林樹哲，佢話，自己大部分錢投資都喺「磚頭」上，手上一股股票都無喎。
