政壇：搞搞政：區會亂質詢阿毛攞嚟衰

點知公民黨（公文袋）議員毛孟靜，忽然跳出嚟，質疑深水埗區議會並冇就項目諮詢當區居民意見，結果身兼深水埗區議員嘅民協立法會議員馮檢基，都忍唔住出聲力證區議會有諮詢。毛議員，鬧人之前都要做吓功課！

雖然，公文袋喺區議會冇乜勢力，人丁單薄，但一億元重點工程都有一定知名度，而且一個政黨有大把政策支援，實在唔應該任由啲議員唔知扮知，然後噏得就噏。

好似深水埗區美孚鄰舍活動中心等社區重點項目咁，並非深水埗區議員嘅阿毛就挑機，一時就質疑當區有區議員懷疑同仁愛堂有利益衝突，一時又話冇諮詢居民，結果先後畀深水埗區議會主席郭振華解畫冇利益衝突，同埋阿基企出嚟作證，力撐區議會有就重點項目徵詢過居民意見。

蔣麗芸寸唔知居民需要

同屬九龍西嘅立法會議員蔣麗芸（Ann）亦幫把口，佢暗寸毛孟靜話，相信當區區議員會更加清楚當區居民嘅需要。