政壇：張學明奉發叔為精神領袖

每逢改選前夕，都有好多傳聞，今屆就有人報料，話鄉議局副主席兼大埔鄉事委員會主席張學明有意競逐鄉議局主席寶座，前晚仲約埋多名北區鄉紳到大埔三門仔一間酒家密斟，莫非真係爭取鄉紳支持？不過，學明就矢口否認，強調百分百支持發叔做精神領袖。

前日傍晚六點幾鐘，學明同另外三人喺三門仔酒家露天茶座圍埋閒談，期間有講有笑，到大約七點半左右，上水鄉委會主席侯志強等人就到場，佢哋成班人就由酒家嘅露天茶座轉入廂房用膳。學明、侯志強等人喺包廂內言談甚歡，不時舉起杯中紅酒，又同身邊人碰杯。約九點鐘眾人才上車離開。

學明接受查詢時話，當晚只係一個朋友聚會，毋須交代傾咗啲咩。咁係唔係藉飯局拉攏鄉紳支持佢選鄉議局主席，學明話：「我一直以來都話發叔係鄉議局嘅精神領袖，我話你知，我係百分之一百，聽清楚，唔係百分之九十九，係百分之一百支持發叔嘅！」