政壇：發展局將陳克勤變李克勤
同名同姓就容易搞錯，同名不同姓都錯就好離譜。立法會議員陳克勤由○八年當選至今都接近七年，但卻持續畀人搞錯佢嘅名，最新一次係畀發展局當咗佢係李克勤！
發展局寄畀陳克勤嘅信抬頭寫住李克勤。（互聯網圖片）
話說以前有公共機構郵寄信件畀陳克勤，都試過將「陳克勤」寫錯做「李克勤」。或者呢個世界其中一個難以改變嘅事，就係人類總要重複犯同樣的錯誤，克勤仔近日又收到發展局公函，抬頭竟然係寄去「李克勤立法會議員粉嶺辦事處」，然後下書陳克勤議員辦事處嘅地址，唔知李克勤幾時做咗議員呢？又或者呢個只係文書人員輸入錯誤，但寄信人員就瞇埋眼去寄？
發展局出錯已經唔係第一次，去年聖誕節，佢哋先至喺社交網站曲線恥笑克勤黨友嘅橫額串錯字，依家連陳克勤個姓都改埋，莫非個局同克勤仔有仇？難怪克勤都只能夠慨嘆「不知所措」喇！
