櫻紅柳綠梗係美 最怕官僚又吹水
香港號稱東方之珠、美食天堂、金融中心、旅遊樞紐、購物天堂，名堂好多o架，可惜就係冇花園城市嘅美譽，一直被市民引為憾事。今個復活節，好多人外遊到日本，唔係貪日圓平，而係為欣賞櫻花之美。其實，人哋可以成為櫻花之國，我哋都可以成為百花之港嘅啫，係咪？
可能係被人鬧得多，港府終於知衰補鑊嘞。由本月起率先喺沙田、西貢、屯門、元朗四個區展開綠化工程，仲每區各有主題添，沙田種串錢柳，元朗種風鈴木，西貢白蘭、含笑等有花植物，屯門種鳳凰木同楓香等紅葉植物，預計工程喺二○一七年完成。當局預告，下階段會喺大埔同長洲試種山櫻，預計市民最快喺一八年就可以喺香港賞櫻，有機會飽覽「落櫻欲滴血，殷紅染霓裳」嘅醉人美景。
如果港府說到做到，梗係好喇。係人都知，香港地理位置好，氣候濕潤，一年四季都適宜種植花草，只要規劃得宜，管理得當，摘下「花園城市」桂冠嘅可能就係香港，而唔係新加坡嘞。太一叮唔係吹水o架，香港擁有唔少具潛力嘅「小花園」，好似大帽山扶輪公園有一小片山櫻樹，每年開花時節，萬紫千紅，爭艷鬥麗，遊人絡繹不絕，就係例子。可惜嘅係，當局捉到鹿唔識脫角，由於種植面積太細，數株難成林，無法形成滿天飛雪嘅壯觀，成唔到大氣候。
所以話啫，香港變成石屎森林，原因係官僚腦袋成舊石屎咁，懶得就懶。開講都有話喇，食不可無肉，居不可無竹。花草樹木除咗係淨化空氣嘅市肺，亦係淨化心靈嘅妙藥，邊個唔希望家居環境成個花園咁，門前屋後有花有草吖，香港若然置身綠樹紅花嘅懷抱之中，市民自然心曠神怡，怨氣都少啲，社會都和諧啲喇。再講，香港成日被人話缺少旅遊景點，其實花花草草都可以吸引遊客o架，問題係當局有冇咁嘅眼光同魄力啫。
唔係睇低港產官僚，事關佢哋做事從來虎頭蛇尾，經常栽花變摧花，種樹變塌樹。又好似佢哋以前都推出過唔少大計，乜嘢生態遊、離島遊、大型單車徑，講到天花亂墜，結果咪又係吹水唔抹嘴。
點講都好喇，但願今次綠化工程可以開花結果，當局可以威番次，如果又係有頭威無尾陣，或者因為官僚卸責、管理不當而搞到周街殘花敗柳，咁就該煨咯，叮！
