世事無奇不有，喇嘛都入馬場？沙田馬場尋日有稀客，約四至五名喇嘛中午喺馬會大董Michael利子厚帶領下現身沙田馬場。Michael話今次到訪嘅其中一位喇嘛係國際人道慈善組織「Live to Love」嘅創辦人嘉旺竹巴法王，近年致力推動保育、教育同照顧流浪動物工作，並對香港賽馬會點樣飼養馬匹好感興趣，於是帶佢入馬場參觀。

利子厚（前右）帶領嘉旺竹巴法王（前左）同多名喇嘛參觀沙田馬場。

Michael話早前係經友人介紹之下認識嘉旺竹巴法王，前日佢先邀請嘉旺竹巴法王前往位於上水的馬會雙魚河鄉村會所參觀，尋日就趁復活節賽馬日帶同嘉旺竹巴法王及數名喇嘛一齊到沙田馬場了解馬匹生活。Michael話唔清楚係咪首次有喇嘛進入馬場，但指對方參觀馬場內嘅馬匹生活環境同情況後感到滿意，認為馬匹表情愉悅。

第一手消息請下載on.cc東網iPhone/iPad/Android/Windows Phone Apps