本港星級造型師Ricky郭慶彬透露，早前首次參加紐約時裝周，天氣好凍，未試過零下十幾度去睇騷，每日都唔想出街，落雪落得好誇張，無帽同手套直頭出唔到街。佢話：「我終於明白點解G-Dragon要戴口罩，好需要一個口罩，啲雪橫飛好似子彈打落面，而且一講嘢就食到成口雪。」Ricky話最開心係喺Tommy Hilfiger時裝騷後台見到英國歌手Rita Ora，話佢好好人，乜嘢人搵佢合照都來者不拒，「最記得我走埋去影相，佢個保鏢攔住我，佢反問你做乜攔住呢位靚仔，我同佢傾過有關衫嘅嘢，佢好有潮流觸覺。至於Tommy Hilfiger都好好人，對任何嘉賓照顧周到，同所有人合照，仲會同每個人傾偈，問吓大家對佢嘅衫嘅感覺，佢知我係形象指導，都有問我有關配搭上嘅心得，我都有問佢靈感來源。佢拉埋我同Rita Ora一齊影相，覺得自己沾咗佢哋光，因為佢哋係國際級，我只係香港形象指導。」

郭慶彬搵Tommy Hilfiger（左）做咗個私人訪問。

英國歌手Rita Ora（右）同郭慶彬合照。

話說有日Ricky同Tommy Hilfiger做咗個私人訪問，Ricky話：「佢初時好嚴肅咁望住我，跟住拉一拉我件衫，我當時好驚，跟住話你着得好好睇，聽到我好開心，真係好感動，我帶咗隻錶送畀佢，佢好鍾意，佢話從來冇人送過手錶畀佢。」

第一手消息請下載on.cc東網iPhone/iPad/Android/Windows Phone Apps