城中鏡：嫻姐搶推美食車 蘇錦樑請都唔到
財爺「鬍鬚曾」曾俊華喺今年份財政預算案提出將外地流行嘅美食車（Food Truck）引入香港，振興本土旅遊業，但原來暫時都係只聞樓梯響。由立法會議員陳婉嫻同香港中文大學建築系副教授鄭炳鴻、文化界人士胡恩威組成嘅「天橋底行動」就先搶飲頭啖湯，喺義賣墟市引入「美食車」，仲邀請鬍鬚曾同負責旅遊範疇嘅商務及經濟發展局局長阿Greg蘇錦樑出席，點知阿Greg請都唔到。
「天橋底行動」搵咗架貨車充當「美食車」做宣傳。
曾俊華嫌「美食車」個Ｑ版公仔漫畫畫得佢太惡。
陳婉嫻（右）向擺檔嘅女青年設計師搭肩打氣。
鬍鬚曾嫌車身頭像太惡
「天橋底行動」尋日喺觀塘海濱天橋底搞咗個義賣墟市，嫻姐就搵架貨車充當「美食車」，仲喺車上畫上鬍鬚曾拎住串魚蛋嘅Ｑ版公仔漫畫。嫻姐話改裝一架美食車要七十萬元，佢哋搞一次活動當然唔使咁多錢，但就希望政府可以資助有意經營美食車嘅販商。鬍鬚曾一見到個漫畫公仔，就嫌畫得佢太惡，仲即場展露笑顏派魚蛋同缽仔糕畀在場小朋友，好似想話畀人知佢不知幾隨和。
嫻姐稱定點車「大笑話」
唔知係咪阿Greg冇出席，架美食車就冇畫到佢個樣。嫻姐仲乘機大數阿Greg完全聽唔明佢講乜咁︰「蘇錦樑話（美食車）係企喺度（固定地點），我哋笑佢咁同排檔有咩分別？」嫻姐仲形容簡直係個「大笑話」。佢希望美食車嘅概念最終可以做到好似電影《滋味旅程》咁，架車可以周圍去喎。
阿Greg就透過新聞秘書回覆話，嫻姐約佢嘅時候咁啱計劃咗離港，所以先推咗，點知又遇着亞視風波，所以先取消離港，強調同嫻姐係好朋友，兩人並無芥蒂咁話。不過，即然Greg蘇咁忙，點解又得閒去今日灣仔會展嘅珠寶商業活動呢？雖然佢冇到，但嫻姐心情仍大靚，唔止向記者大讚墟市擺賣嘅有機粟米超甜，又花咗約二百元向喺墟市擺檔嘅女青年設計師買咗一隻熊貓圖案戒指同一條黑色五角星頸鏈，仲急不及待戴上身添，真係估唔到嫻姐都咁潮喎。
