喺政改第二輪諮詢後，政府就要向立法會提交諮詢結果嘅報告同政改方案，坊間一直都講緊政府至少要喺泛民主派議員當中撬四票，政改方案先有望通過。不過，議員梁美芬尋日就話，覺得政府嘅目標唔應該只係撬四票，而係要撬夠八票以上先至穩陣。
依家泛民否決政改方案嘅態度咁強硬，撬走四票已經好難，究竟有咩契機可以畀泛民「轉身」呢？梁美芬就慨嘆︰「咁要睇香港嘅地運喇！」再問佢乜嘢「地運」？佢就唔想多講喇！講到咁玄，唔通梁美芬最近學緊睇風水？
