香港專上學生聯會作為支聯會創會成員,每年例牌要派代表去維園嘅六四燭光晚會,但年初港大成功退出學聯(退聯)後,港大學生會嘅時事委員會打算喺今年六四另起爐灶,籌備校內悼念活動,同支聯會搞嘅維園晚會分庭抗禮。不禁要問,港大學生會過往係因為有學聯或支聯會成員身份,先至去參加維園六四燭光晚會嘅咩?

馮敬恩澄清港大學生會籌備嘅六四晚會同支聯會晚會並無衝突。(資料圖片)

港大學生會會長馮敬恩承認,有委員提出籌備校內晚會嘅初步建議,佢哋將會喺四月底嘅時事委員會會議正式討論同落實具體細節,期望籌組一個開放畀公眾參與嘅悼念晚會。馮敬恩澄清,學生會籌備嘅晚會同支聯會晚會並無衝突,相信雙方都係本着「平反六四,建設民主中國」嘅信念,學生會去年都有喺校園同時宣傳尖沙咀本土晚會同支聯會維園晚會,畀同學按個人意願自由選擇。

港大退聯兩個月,雖然學聯或港大學生會否認會有影響,仲口口聲聲話維持友好關係,但學界二十五年來首次唔再統一支援六四活動,相信退聯後遺症將會逐步浮現。

第一手消息請下載on.cc東網iPhone/iPad/Android/Windows Phone Apps